أخبار عاجلة
الرئيسية / راحة للمُتعـَبين / قِصتي: إحساس الخيانة صعب جداً – ربنا ما يدوقه لحد أبداً

قِصتي: إحساس الخيانة صعب جداً – ربنا ما يدوقه لحد أبداً

   
#م_الاخر

– م الاخر: أنا موضوعى شبه الأفلام الهندى بالظبط صعب يتصدق.. بس دا اللى حصل معايا.. بدون تزويق أو تزييف في الكلام..
انا كنت مرتبط ببنت 3 سنين اول واخر حب في حياتي وكنا بنحب بعض اوى وفيه مواقف حلوة كتير اوى اوى بينا . عمرى ما قصرت معاها لدرجه ان جه وقت ظروفى المادية كانت صعبه وكانت هى بتحتاج فلوس عشان دراستها كنت بحرم نفسي من الاكل بمعني الكلمه عشان ابعتلها فلوس بس الحمد لله دلوقتي الظروف اتحسنت اوي اوي ..

عمرى ما قصرت معاها ، عمرى ما زعلتها ، عمرى ما اتعصبت عليها ، عمرى ما اتحكمت فيها ،كنت دايما جمبها وفي ظهرها ، كنت دايما بعملها مفاجأت وبفرحها ، كنت بحاول اكون مختلف في علاقتي معاها عن اي اتنين مرتبطين . اهلى كانوا عارفين بموضوعنا مفروض اني هتقدم بعد شهر هتكون خلصت كليه .

اللى حصل فجأة و بدون مقدمات :-

1 ) إكتشفت بالصدفة بالادله المادية وبالصور انها على علاقه بشاب من ديانة مختلفة.. بقالهم اكتر من سنتين وحصلت بينهم حب و مشاعر و تجاوزات جسديه بصورة تخليني اشك انها بنت .. مع انها (تاسونى) وخادمة ! واجهتها بالكلام انكرت طبعا وزعلت وعملت اني جرحتها . بس لما واجهتها بالصور والاداله وبكل حاجه اعترفتلى انها عملت كدة .

2 ) عرفت بالصدفه انها زقت عليا بنت تحاول تجيب رجلى سورى فى الجنس . بس عشان انا علاقتي حلوة مع ربنا وخادم وشماس اولا و بحبها وبحترمها ثانيا صديت البنت دي ورحت حكيتلها الموضوع وكدة . بعدين اكتشفت بالصدفه ان البنت دي تبعها وهى اللى رميتها عليا ! وبصفه عامه انا كنت بحترمها اوى في غيابها وربنا يعلم اني كنت بتجنب اي احتكاك مع اي بنت بصفه عامه حتى فى شغل احتراما ليها .

المشكله اني اتصدمت صدمه كبيرة اوى.. و أى حد هيتخيل نفسه مكانى هيحس باللى انا حسيته وكانت النتيجه :-

1) اى حد غيري من صدمته كان فيه مليون طريقه ينتقم منها بيها بس ربنا ادانى حكمه ومعملتش حاجه غير انى عرفت اب اعترافها عشان يتابعها ويرجعها للكنيسه و اب اعترافها نفسه اتصدم جدا ، وانا انسحبت من حياتها تماما !

2) بعاتب ربنا وزعلان انه دخلني في التجربه دي انا ماستهلش ان موضوع زي كدة يحصل معايا دا اول ارتباط في حياتي يعني انا كنت صفحه بيضا . وماليش اى علاقات غلط في حياتي . ايه الحكمه في ان دا يحصلى ! .. ومن ناحيه تانيه بشكره جدا انه كشفلى الموضوع دا بالصدفه البحته بطريقه فعلا معجزية !

3 ) اهلى في البيت كل شويه يجبولى سيرة الخطوبة منها وبيستعجلونى وببقي مش عارف ارد اقولهم ايه ومستحيل احكيلهم حاجه عشان مبوظش صورتها قدام حد .

اعمل ايه عشان انسى الموضوع دا .؟
اعمل ايه عشان اصلح فكرى ونظرتى للبنات بصفه عامه؟؟ .
اعمل ايه عشان اقدر اعيش حياتي طبيعي . ؟
اعمل ايه لما بتوحشنى ؟.
اعمل ايه مع اهلى اللى بيكلموني ع الجواز منها كل شويه ؟.
اعمل ايه عشان اقدر اثق في البنت اللى هتجوزها ومظلمهاش ومتعبهاش معايا . ؟
اعمل ايه عشان ارجع الحب و المشاعر اللى ضيعتها معاها . ؟
اعمل ايه عشان ارجع انسان طبيعي ؟.

سامحونى كلامي دا من صدمه كبيرة حب 3 سنين وياريتها بعيد عن ربنا كنت قولت اختارت غلط .. لا دي تاسوني !
إحساس الخيانة دا طلع صعب اوي ربنا ما يدوقه لحد ابدا .

رجاء محبه:
انا هتابع كل التعليقات ورأيكم.. اللي يرد يحط نفسه مكانى.. يغمض عينيه ثانيه ويتخيل الاحداث دي بتحصل معاه و بعدين يرد .

شاهد أيضاً

بيحبني وبيحب أولادي- بس خايفة من كلام الناس؟

– م الاخر: عايزة انزل مشكلتى بدون اسم.. انا ارمله من سنه ونص وعندى ثلاث …

شير