أخبار عاجلة
الرئيسية / راحة للمُتعـَبين / اللي حبيته كداب وأهلي مش موافقين عليه- قولولى أعمل أيه؟

اللي حبيته كداب وأهلي مش موافقين عليه- قولولى أعمل أيه؟

   
#م_الاخر

– م الاخر: انا بنت من الصعيد 33 سنه مؤهل عالى وجميلة وعائليا وماديا كويسه جدا .. مريت بظروف وحشه والدتى اتوفت من 5 سنين وبقيت مسئوله عن واسرتى واتحملت المسئوليه ..

بس بابا حس ان حياتى مالهاش اى معنى ..طلب منى انى لازم اشتغل واخرج واشوف ناس وناس تشوفنى وانى كبرت ولازم اتعلم اعرف حقوقى وازاى اتعامل مع الناس واخد خبرة ..

وواقفت ونزلت الشغل فى شهر 3 اللى فات ومستمرة والحمد الله وفرق معايا جدا فى خلال الفترة دى اتقدملى شخص من الشغل هو اكبرمنى ب4 اشهر وعائليا كويس بس ماليا مش قد كده مرتبه 4 الاف جنيه فقط ومكتفى به لانه شغل حكومه ومش مستعد يعمل اى مشروع عنده شقه تمليك بس لسه بيشطب فيها

وقال انه كان خاطب مرة وفك وللاسف قعد مع اخويا وابويا كذا مرة واكتشوا انه كداب لانه كان خاطب اكتر من مرة وواجهوة قال اه مرتين وكذا حاجة تانى كذب فيها

بابا واخويا شايفين انى لو اخدته هتعب وخصوصا ان الكدب ده مشكله كبيرة وان نشوف فرصه افضل وحد يريحنى ونغير ونسافر اى مكان تانى ونبدا حياتنا من جديد واكيد ربنا هيبعت النصيب الصالح

لكن لو انا اخدته اتحمل المسئوليه وهما مالهومش دعوة بيا ولا هيتعاملوا معاه اصلان لانه مش مقبول ليهم هيبقى فى حدود السلام وبس بصراحة انا حاسه انى كبرت وطول الوقت وحدى ومحتاجة انى اكون مستقله وليا اسرة وبيت واولاد انا كلمته وقلتله مش هينفع نكمل وانه مفيش نصيب بس هو قال انه مش هيسيبنى مهما حصل وبيحاول يعمل المستحيل وكلم والدى كذا مرة ومتمسك بيا لاقصى حد بس بابا شايف انه بيعمل كده علشان انا فرصه بالنسبه له لان عيلتى اسم وماديا ممكن والدى يساعدنى فى الشقه والتشطيب لانى بنته وبيحبنى ومش هيبخل عليا اكيد ..

انا مش عارفه اعمل ايه اجازف واتحدى الدنيا واكمل معاه واتحمل النتيجة سواء حلوة او وحشه ولا اسمع كلام اخويا ووالدى واسافر ويمكن الاقى شخص افضل وفرصة احسن ..

ياريت تقولولى اعمل ايه لانى بجد تعبانه قوى وانا حاسه انى بحبه ومش قادرة اشوف حياتى من غيرة لانه هو غيرنى وشجعنى على شغلى وكمان بيساعدنى فيه وخلانى مميزة فى كل حاجة.

شاهد أيضاً

بيحبني وبيحب أولادي- بس خايفة من كلام الناس؟

– م الاخر: عايزة انزل مشكلتى بدون اسم.. انا ارمله من سنه ونص وعندى ثلاث …

شير